کەمپەینی ڕێکخراوە مەدەنییەکانی پیرانشار لە کەمپەینی تەواو "ئینتەرنێتی" و "مەجازیـ"ـدا توانییان بە هاوکاریی چالاکانی مەدەنیی ئەو شارە بڕی ٧٢ ملیۆن و ١٠٠ هەزار تمەن بۆ لێقەوماوانی بوومەلەرزەی کوتۆل کۆ بکەنەوە.
دەوڵەتی عێراق بۆ پێشگرتن لە بڵاوبوونەوەی ڤایرۆسی کۆرۆنا لە وڵاتەکەی، سنوورەکانی سوومار و خوسرەویی لەگەڵ ئێران، بۆ ماوەی حەوتوویەک داخست.
چالاکێکی مەدەنی و ژینگەیی کورد بە ناوی "سیروان ڕەحیمی"، تەمەن ٣٠ ساڵ، خەڵکی شاری دێولان، لەلایەن دادگای ئینقلابی شاری سنەوە بە ١٣ مانگ زیندانیی تەعزیری مەحکووم کرا.
ژمارەیەک لە کرێکارانی شیرکەتی ڕامپکۆی ئیلام، باسیان لە دواکەوتنی پارەی چەند مانگەیان لەلایەن خاوەنکاری ئەو شیرکەتەوە کردووە.
چەند ڕۆژ پێش، هاووڵاتییەکی کورد بە ناوی "فەرید موختاری" خەڵکی گوندی "دەوڵەت ئاوا"ی شاری ڕوانسەر، لە ڕێگای خۆکوژییەوە کۆتایی بە ژیانی خۆی هێنا.
"فەردین مستەفایی"، ئەندامی فیدارسیۆنی نێونەتەوەیی ڕۆژنامەنووسان و بەڕێوەبەری کەناڵی "سەقز ڕووداو"، لەلایەن پۆلیسی ئەمنییەتیی شاری سەقزەوە بانگهێشت و لێپرسینەوەی لەگەڵ کرا.
زیندانییەکی گوماناوی بە ڤایرۆسی کۆرۆنا بە ناوی "مووسا نەعمانی"، تەمەن ٥٧ ساڵ، خەڵکی "دزەی دۆڵ" سەر بە ورمێ کە لە نەخۆشخانەی تاڵقانی خەوێندرابوو، مورەخەس کرا.
ڕۆژی پێنجشەممە ١٥ی ڕەشەمە، دوو لاوی کورد بە ناوەکانی "حەمید ئەژدەری" کوڕی "مەحموود" و "ئوسامە بامداد" کوڕی "ئارام"، خەڵکی گوندی "نێـ"ـی مەریوان، هەر کام بە دانانی بارمەتەی ١٠٠ ملیۆن تمەنی بە شێوەی کاتی لە گرتنگە ئازاد کران.
ڕۆژی چوارشەممە ١٤ی ڕەشەمە، زیندانییانی بەندی ١٥ی زیندانی ناوەندیی ورمێ، بە نیشانەی پێنەدانی مورەخەسی مانیان گرت.
حیسابە بانکییەکانی "کامران ساختمانگەر"، چالاکی کرێکاریی خەڵکی سنە، بە نامەی دادگاییەکانی لە تاران داخران و ڕاگیراوە.
ئاژانسی هەواڵدەریی کوردپا
