۱۵ی ڕەزبەری ۱۴۰۵؛ «سەردار سەیدعەبدوڵڵاهی»، لاوی ۱۹ ساڵەی خەڵکی گوندی «گەزگەسک»ی سەر بە پیرانشار، یەکێک لە بەندکراوانی سیاسیی بەندکراو لە بەندیخانەی ورمێیە کە سەرقاڵی تێپەڕاندنی ماوەی سزاکەی لەم بەندیخانەیەدایە. ئەم ڕاپۆرتە بۆ یەکەم جار سەبارەت بە دەسبەسەرکردن و دەرکردنی سزای ۱۸ مانگ بەندکرانی داسەپاو دژی ئەو بڵاو دەکرێتەوە کە تا ئێستا ۹ مانگی لێ تێپەڕاندووە. ئەم لاوە کوردە ۴۵ ڕۆژ لە ژوورە تاکەکەسییەکانی گرتنگە ئەمنییەکانی پیرانشار و ورمێدا بەند کراوە و پاشان بێ بەهرەمەندبوون لە مافی ئازادیی کاتی و دەستڕاگەیشتن بە پارێزەر، لەلایەن دادگای ئینقلابی ورمێوە سزای بەندکرانی بەسەردا سەپێندراوە.

بەوتەی سەرچاوەیەکی ئاگاداری کوردپا؛ «سەردار سەیدعەبدوڵڵاهی»، لاوی ۱۹ ساڵەی خەڵکی گوندی «گەزگەسک»ی سەر بە پیرانشار، ڕۆژی ۱۱ی نەورۆزی ۱۴۰۴ لەلایەن هێزە ئەمنییەکانی ئیدارەی ئیتلاعاتی پیرانشارەوە دەسبەسەر کرا. ئەو دوای ماوەیەک لێکۆڵینەوە بۆ ئیدارەی ئیتلاعاتی ورمێ گوێزرایەوە و دوای ۴۵ ڕۆژ دەسبەسەرکردنی سەرەڕۆیانە، بۆ بەندی سیاسیی بەندیخانەی ورمێ گوێزرایەوە.

بەوتەی ئەم سەرچاوەیە، «سەردار سەیدعەبدوڵڵاهی» دوای تێپەڕاندنی شەش مانگ لە دەسبەسەرکردنی سەرەڕۆیانەی لە گرتنگە ئەمنییەکان و بەندیخانەی ورمێدا، لەلایەن دادگای ئینقلابی ورمێوە بە تۆمەتی «هاوکاری لەگەڵ یەکێک لە حیزبە کوردستانییەکان» سزای ۱۸ مانگ بەندکرانی داسەپاوی بە هەژمارکردنی ڕۆژانی پێشوو بەسەردا سەپێندرا.

ئەم سەرچاوەیە زیادی کرد؛ دەسبەسەرکردن و دەرکردنی سزا دژی ئەم لاوە کوردە لەکاتێکدا ڕووی داوە کە لە ئیدارەی ئیتلاعاتی پیرانشار هیچ بەڵگەیەک دژی ئەو لە ئارادا نەبووە و ئەم سزایە لەسەر بنەمای سکاڵای سکاڵاکارێک دژی ئەو دەرچووە.

هەتا کاتی بڵاوبوونەوەی ئەم ڕاپۆرتە، «سەردار سەیدعەبدوڵڵاهی» ۹ مانگ لە ماوەی سزاکەی بێ بەهرەمەندبوون لە مافی ئازادیی کاتی لە گرتنگە ئەمنییەکان و بەندیخانەی ورمێدا تێپەڕاندبوو. ئەو لە حەفتەکانی ڕابردوودا، بۆ یەکەم جار لە مافی مۆڵەت بەهرەمەند بوو و دوای کۆتاییهاتنی مۆڵەتەکەی، بۆ تێپەڕاندنی باقیی ماوەی سزاکەی ڕادەستی بەندیخانەی ناوەندیی ورمێ کرایەوە. 

بەوتەی ئەم سەرچاوەیە، «سەردار سەیدعەبدوڵڵاهی» لە کاتی دەسبەسەرکردندا لە گرتنگە ئەمنییەکاندا، هم لە مافی پەیوەندی و چاوپێکەوتن لەگەڵ بنەماڵەکەی و هم لە دەستڕاگەیشتن بە پارێزەر، چ لە سەردەمی لێکۆڵینەوە و چ لە کاتی ڕاگەیشتن بە دۆسییەکەی لە دادگادا، بێبەش کرابوو.

«سەردار عەبدوڵڵاهی»، کوڕی سەلمان و لاوی ۱۹ ساڵەی خەڵکی گوندی «گەزگەسک»ی سەر بە پیرانشارە و لە کاتی دەسبەسەرکردنیدا سەرقاڵی تێپەڕاندنی سەربازیی زۆرەملێ بووە.