ئاژانسی هەواڵدەریی کوردپا
ئاژانسی کوردپا: لە ٥ مانگدا، ٤٠ هاووڵاتیی کوردی خەڵکی شارەکانی پارێزگای ورمێ، لە کاتی مەلەکردندا خنکاون.
بەرپرسی ناوەندی ڕووداو و ئوڕژانسی پارێزگای ورمێ، لەو بارەیەوە ڕایگەیاند: "لە ٥ مانگی سەرەتای ئەمساڵدا، ٤٠ هاووڵاتی، بەهۆی ئاشنانەبوون بە مەلەکردن، گیانیان لەدەست داوە".
"باقر بەهرامی" ڕایگەیاند: "بەگشتیی ٦٩ هاووڵاتی بەهۆی ناشارەزابوون لە فەنی مەلەکردن، تووشی خنکان بوون کە ٤٠ کەسیان گیانیان لەدەست داوە و ٢٩ کەسی دیکەیان لە نەخۆشخانە لە مردن ڕزگاریان بووە".
بە وتەی ئەو بەرپرسە حکوومەتییە، خنکانی ئەم ٤٠ هاووڵاتییە، لە مانگی خاکەلێوەی ئەمساڵ هەتا ١٢ی گەلاوێژ، بووە.
"باقر بەهرامی" هەروەها ڕایگەیاند: "لە شاری ورمێ ٢٩ کەس، خۆی ٩ کەس، شنۆ ٢ کەس، میاندواو ٦ کەس، سەردەشت ٨ کەس، ماکۆ ٢ کەس، مەهاباد ٢ کەس، پیرانشار ٥ کەس، بۆکان ١ کەس، سایین قەڵا ٣ کەس و چایپارە ٢ کەس، کە سەرجەم ٦٩ کەس بوون و ٤٠ کەسیان گیانیان لەدەست داوە".
بەرپرسی ناوەندی ڕووداو و ئوڕژانسی پارێزگای ورمێ، بە بەراوردکردنی خنکانی هاووڵاتییان لەگەڵ ساڵی ڕابردوو، ڕایگەیاند: "ساڵی ڕابردوو سەرجەم ٢٢ حاڵەتی خنکان بووە کە ١٧ کەسیان گیانیان لەدەست داوە و ٥ کەسیان لە مردن ڕزگاریان بووە".
ناشارەزایی لە مەلەکردن و نەبوونی تابلۆکانی ڕێنوێنی و هۆشداری لە شوینە گەشتیارییەکان، ساڵانە چەندین هاووڵاتیی کورد دەکاتە قوربانی.
