ڕۆژی چوارشەممە ١٥ی بەفرانبار،ژنێک بە ناوی "ئێلناز کەلەشی"، کچی "فارس"، خەڵکی گوندی "قونی" سەر بە ناوچەی سۆما و برادۆستی ورمێ کە ئاگری لە جەستەی خۆی بەردابوو، بەهۆی ڕێژەی زۆری سووتاوییەکەیەوە گیانی لەدەست دا.
ڕۆژی سێشەممە ١٤ی بەفرانبار، کرێکارێک بە ناوی "حیکمەت ئیبراهیمی" خەڵکی "نۆشین شار" سەر بە ورمێ، بەهۆی ڕووداوی کار گیانی لەدەست دا.
ڕۆژی سێشەممە ١٤ی بەفرانبار، دوو هاووڵاتیی کورد بە ناوەکانی "ئەحەد مەولوودی"، کوڕی "موتەلیب"، خەڵکی گوندی "وێنسلییان" و "حوسێن خەلیانی"، کوڕی "خوسرەو"، خەڵکی گوندی "کۆییک" سەر بە نەغەدە، لەلایەن هێزە ئەمنییەتییەکانەوە دەسبەسەر کران.
ڕۆژی سێشەممە ١٤ی بەفرانبار، هاووڵاتییەکی کورد بە ناوی "چەکۆ قەلەندەری"، کوڕی "حوسێن" و خەڵکی گوندی "کۆییک" سەر بە نەغەدە، لەلایەن هێزە ئەمنییەتییەکانەوە دەسبەسەر کرا و بۆ شوێنێکی نادیار ڕاگوێزرا.
حوکمی لەسێدارەدانی هاووڵاتییەکی کورد بە ناوی "مەحیەدین تازەوارد"، کوڕی "یووسف" و خەڵکی شنۆ، لە دیوانی باڵای وڵات هەڵوەشایەوە و ڕۆژی دووشەممە ١٣ی بەفرانبار بە دانانی بارمتەی ٥٠٠ ملیۆن تمەنی لە زیندانی ورمێ ئازاد کرا.
دەبیرخانەی ڕێکخراوی داکۆکی لە مافی مرۆڤی کوردستان بە بڵاوکردنەوەی بەیانییەیەک خوازیاری جێبەجێنەکردن و هەڵوەشاندنەوەی حوکمی زیندانی "زارا محەممەدی"، مامۆستای زمانی کوردی بوو.
شەوی یەکشەممە ١٢ی بەفرانبار، کۆڵبەرێکی کورد بە ناوی "عومەر یاقووبی"، خەڵکی گوندی "کڵاش باخان"، سەر بە جوانڕۆ لە ئەنجامی تەقەی هێزە نیزامییەکانی حکوومەتی ئێران لە سنووری نەوسوود بریندار کرا.
شەوی یەکشەممە ١٢ی بەفرانبار، کۆڵبەرێکی کورد بە ناوی "سەلاح شامورادی"، خەڵکی گوندی "زێڕان" سەر بە جوانڕۆ، لە ئەنجامی تەقەی هێزە نیزامییەکانی حکوومەتی ئێران لە سنووری نەوسوود بریندار کرا.
ڕۆژی دووشەممە ١٣ی بەفرانبار، ئیتلاعاتی سپا لە ڕێگەی پەیوەندییەکی تەلەفۆنیدا هەڕەشەی دەسبەسەرکرانی لە "محەممەد مەمەندزادە"، چالاکی مەدەنی و ژینگەیی خەڵکی سەردەشتی کرد.
ڕۆژی یەکشەممە ١٢ی بەفرانبار، حەوت هاووڵاتیی کورد بە ناوەکانی "فەرهاد پزیشکی، وەفا پزیشکی، ئەحمەد پزیشکی، کامران پزیشکی، لوقمان پزیشکی، کەریم فرووزش و عوسمان محەممەدپوور"، خەڵکی بانە، بە دانانی بارمتە لە زیندانی سنە ئازاد کران.
ئاژانسی هەواڵدەریی کوردپا
