حەسەن ئەمینی، برای محەممەد ئەمینی، لە گیانلەدەستداوانی بزووتنەوەی ژن، ژیان، ئازادی لەلایەن لقی ١٠١ی دادگای کەیفەری ٢ی بۆکانەوە بە ٦ مانگ و نیو زیندان و لێدانی ٤٠ قامچی مەحکووم کرا.
مامۆستا هادی ئەحمەدی، وتاربێژ و مامۆستای قوتابخانەی زانستی دینیی شەمسولعارفین نەجاری پاوە، بانگهێشتی دادگای تایبەتی ڕۆحانییەت لە کرماشان کرا.
دوانیوەڕۆی ڕۆژی چوارشەممە، ١٤ی پووشپەڕ، هێزە ئەمنییەتییەکان بە بێ بەڵگەی یاسایی هێرشیان کردووەتە سەر ماڵی هاووڵاتییەکی دەسبەسەرکراو بە ناوی "هێمن حوسێنی"، خەڵکی سەقز و دەستیان بە پشکنینی ماڵەکەی کردووە.
ڕۆژی پێنجشەممە، ٨ی پووشپەڕ، مێرمنداڵێکی تەمەن ١٥ ساڵ بە ناوی "ئەرەشک قەیسەربەیگی"، خەڵکی ئیلام و دانیشتووی سەراوڵە، لەلایەن هێزە ئەمنییەتییەکانەوە دەسبەسەر کرا.
ڕۆژی شەممە، ١٠ی پووشپەڕ، هاووڵاتییەکی کورد بە ناوی "ئەحەد تاهیری"، تەمەن ٢١ ساڵ و کوڕی یوونس، خەڵکی نەغەدە، لەلایەن هێزە ئەمنییەتییەکانەوە دەسبەسەر کرا و بۆ شوێنێکی نادیار ڕاگوێزرا.
ڕۆژی سێشەممە، ١٣ی پووشپەڕ، لاوێکی کورد بە ناوی "فەرهاد ئیسماعیلی"، خەڵکی نەغەدە و دانیشتووی ورمێ، لەلایەن هێزە ئەمنییەتییەکانەوە دەسبەسەر کرا.
ڕۆژی سێشەممە، ١٣ی پووشپەڕ، هاووڵاتییەکی کورد بە ناوی "شوانە بابەکری"، کوڕی ڕەشید و خەڵکی گوندی "کانی ڕەش"، سەر بە شاری شنۆ، لەلایەن هێزە ئەمنییەتییەکانەوە دەسبەسەر کرا.
ڕۆژی سێشەممە، ١٣ی پووشپەڕ، کۆڵبەرێک بە ناوی "هێمن مەحموودی"، خەڵکی گوندی "کانی ڕەش"، سەر بە شاری سەلاسی باوەجانی، لەلایەن هێزە نیزامییەکانی حکوومەتەوە لە سنووری نەوسوود تەقەی لێ کرا و چاوی بریندار بوو.
ڕۆژی سێشەممە، ١٣ی پووشپەڕ، موختار مینبەری، هاووڵاتیی خەڵکی گوندی "نییەر"، سەر بە شاری سنە، بە دانانی بارمتەی ٥٠٠ میلیۆن تمەنی و بە شێوەی کاتی لە زیندانی ئەم شارە ئازاد کرا.
سەرکوت، دەسبەسەرکران، هەڕەشە و تۆقاندن، تەقەکردن لە دەست و لاق و سینگی خۆپیشاندەران بە چەکی ساچمەیی و جەنگی و ... بەشێک لەو سەرکوتە سیستماتیک و ئامانجدارەیە کە هێزە سەرکوتکەرەکان لە بزووتنەوەی ژن، ژیان، ئازادیدا کەڵکیان لێ وەرگرتووە.
ئاژانسی هەواڵدەریی کوردپا
