ئاژانسی هەواڵدەریی کوردپا بۆ زیاتر زەق کردنەوەی هەرچی زیاتری پێشێلکاریی مافی مرۆڤ دەرهەق بە هاووڵاتییانی کورد لەناوچە کوردییەکانی ئێران حەفتانە راپۆرتێک لەژێر ناوی "روانگەی حەفتە"دا بڵاو دەکاتەوە.
هاووڵاتییەکی تەمەن ٣٠ ساڵەی خەڵکی سەردەشت، لە ئەنجامی تەقەی راستەوخۆی هێزە ئینتزامییەکانی حکوومەتی ئیسلامیی ئێران لە نزیک شاری بانە کوژرا.
هاووڵاتییەكی مەدەنی لەشاری سەردەشت بەبێهۆكارێكی روون لەلایەن هێزە ئینتزامییەكانەوە تەقەی لێكراوە و لەئەنجامدا گیانی لەدەست داوە.
لەسەرەتای هاتنە سەرکاری "حەسەن رۆحانی"یەوە هەتا ئێستا ١٤٥ هاووڵاتیی لەوڵاتی ئێراندا لەسێدارە دراون.
یەکێک لە چالاکانی خوێندکاریی کوردی خەڵکی شاری مەریوان پاش ئەوەی رۆژی دووشەممەی رابردوو هاوڕێ لەگەڵ ٤ کەسی دیکە لە چالاکانی خوێندکاریی ئەو شارە دادگایی کرا، حوکمی ١ ساڵ زیندانیی هەڵپەسێردراوی بە سەردا سەپا.
دوو هاووڵاتیی کوردی خەڵکی دەوروبەری شاری خۆی لەئوستانی ئازەربایجانی رۆژئاوا، لەجاددەی نزیک گوندی "چاوش قولی"ی سەربەو شارە، لەلایەن چەکدارانی سپای پاسدارانەوە درانە بەر دەستڕێژ و لەئەنجامدا بە توندی بریندار بوون.
خالید حەردانی زیندانیی عەرەبی خەڵکی ئەهواز لەلایەن مەئموورانی زیندانی رەجایی شاری کەرەجەوە بۆ ژووری تاکە کەسیی ئەو زیندانە گوازرایەوە.
چالاکێکی سیاسیی کوردی نیشتەجێی وڵاتی هۆلەند، بەرەوڕووی مەترسیی دیپۆرت کرانەوە بووەتەوە.
محەممەدعەبدوڵڵاهی زیندانی سیاسیی کورد لە لایەن لقی ١ی دادگای ئینقلابی شاری مەهابادەوە بەئێعدام مەحکووم کراوە و حوکمەکەش بە شێوەی زارەکی بەو هاووڵاتییە کوردە راگەیەندرا.
یەکێک لەچالاکانی فەرهەنگیی کوردی خەڵکی ئوستانی خۆراسانی باکوور پاش زیاتر لە ٣مانگ لە دەستبەسەر کرانەوەی، هەتا ئێستا چارەنووسی ناڕوونە.
ئاژانسی هەواڵدەریی کوردپا
