حەمید حوسێننژاد حەیدەرانلوو، بەندکراوی سیاسیی کوردی خەڵکی گوندی "سگریک" سەر بە شاری چاڵدێران لەلایەن لقی یەکی دادگای ئینقلابی ورمێوە بە سەرۆکایەتیی دادوەر "نەجەفزادە" بە تۆمەتی "بەغی" بە لەسێدارەدران سزا درا.
هاووڵاتییەکی کورد بە ناوی "ئیبراهیم خیشکار" خەڵکی گوندی "دەل" سەر بە شاری سەوڵاوا و دانیشتووی مەریوان، لەلایەن دادگای ئینقلابی مەریوانەوە بە یەک ساڵ بەندکرانی هەڵپەسێردراو و ٦ مانگ بەندکرانی داسەپاو سزا درا.
ڕۆژی یەکشەممە ٨ی ڕەزبەری ١٤٠٣، هاووڵاتییەکی کورد بە ناوی "ئومید فەرەجی" تەمەن ٤٠ ساڵ و خەڵکی گوندی "نێ" سەر بە شاری مەریوان بە دانانی بارمتەی یەک میلیارد تمەنی و بە شێوەی کاتی لە بەندیخانەی ئەم شارە ئازاد کرا.
ئانتیە گرۆتێر، نوێنەری پارلەمانی بێرمەن لە فراکسیۆنی SPD و کەفیکی سیاسیی عوسمان ئیسماعیلی، چالاکی کرێکاریی کورد بە بڵاوکردنەوەی پەیامێک خوازیاری ئازادیی ناوبراو و هەموو بەندکراوانی سیاسیی ئێران بوو.
سەرەڕای تێپەڕبوونی ٨ ڕۆژ لە دەسبەسەرکرانی ئەمیرحوسێن حەقجوویان، خاڵۆزا و لە هاوڕێیانی نزیکی ڕەزا ڕەسایی ناڕازیی لەسێدارەدراو، سەبارەت بە دۆخی ناوبراو زانیارییەک لەبەر دەستدا نییە.
مەحموود سادقی، بەندکراوی سیاسیی کوردی خەڵکی کامێران سەرەڕای تێپەڕبوونی ٨ ساڵ لە کاتی دەسبەسەرکران، هەروا لە مافی مورەخەسی بێبەری کراوە.
ڕۆژی شەممە ٧ی ڕەزبەری ١٤٠٣، هاووڵاتیی کورد بە ناوی "فەرشید زارعی" خەڵکی سنە لە سێڕێیانی نمەکیی ئەم شارە، کرایە ئامانجی هێرشی "کەسانی سەلەفیی توندئاژۆی نزیک لە حکوومەت" بە "چەقۆ و قەمە" و بە هۆی توندی و زۆریی برینەکانییەوە چووە کۆماوە.
ڕۆژی پێنجشەممە ٥ی ڕەزبەری ١٤٠٣، سۆهراب ئاویزکەن، بەندکراوی سیاسیی خەڵکی مەهاباد کە ماوەی سزاکەی لە بەندیخانەی ئەم شارە تێپەڕ دەکات، نێردرایە مورەخەسی.
محەممەد ڕەسووڵپوور، هاووڵاتیی خەڵکی شنۆ لەلایەن دادگای ئینقلابی ئەم شارەوە بە سەرۆکایەتیی دادوەر "عەلی ئەنساری" بە دوو ساڵ بەندکرانی داسەپاو سزا درا.
سەرلەبەیانیی ڕۆژی چوارشەممە ٤ی ڕەزبەری ١٤٠٣، سزای لەسێدارەدانی بەندکراوێک بە ناوی "کامبەخش مەحموودی" خەڵک شاری بێستوون لە بەندیخانەی ناوەندیی کرماشان جێبەجێ کرا.
ئاژانسی هەواڵدەریی کوردپا
