ڕۆژی شەممە، ٢٩ی ڕەزبەر، کچێکی لاو بە ناوی "سیما عەباسی"، تەمەن ١٩ ساڵ و خەڵکی بۆکان، پاش ١١ ڕۆژ مانەوە لە نەخۆشخانەیەکی تەورێز، بە هۆی قووڵبوونی برینەکانی لە دوای خۆسووتاندن، گیانی لەدەست دا.
یاسر نووری، چالاکی ژینگەپارێزیی خەڵکی جوانڕۆ لەلایەن لقی ٤ی دادگای ئینقلابی کرماشانەوە بە تۆمەتی "پڕوپاگەندە دژی نیزام"، بە ٤ مانگ زیندانی تەعزیری مەحکووم کرا.
ڕۆژی سێشەممە، ٢ی خەزەڵوەر، کۆڵبەرێکی کورد بە ناوی "موحسن عەبدوڵڵاهی"، کوڕی ناسر، خەڵکی گوندی "کانی بەرد"، سەر بە شاری بانە، بە تەقەی هێزە نیزامییەکانی حکوومەت لە دڵی، کوژرا.
سەرلەبەیانیی ڕۆژی سیشەممە، ٢ی خەزەڵوەر، حوکمی لەسێدارەدرانی زیندانییەک بە ناوی "ئەلف_م"، لە زیندانی خۆی، جێبەجێ کراوە.
حوکمی زیندانی موژگان کاوسی، لێکۆڵەر و چالاکی بواری زمان و ئێتنیکی خەڵکی کەلاردەشتی مازەندەران، لە لقی ٩ی دیوانی باڵای وڵاتدا پشتڕاست کرایەوە.
ڕۆژی دووشەممە، یەکی خەزەڵوەر، کۆڵبەرێک بە ناوی "زانکۆ گەوهەری"، خەڵکی بانە، بە تەقەی هێزە نیزامییەکانی حکوومەت لە سنووری "هەنگەژاڵ"ی ئەم شارە بریندار کرا.
ڕۆژی دووشەممە، یەکی خەزەڵوەر، تارق ڕەحیمپوور، تەمەن ٣٩ ساڵ و کوڕی مووسا، خەڵکی گوندی "ئەوێهەنگ" و دانیشتووی سنە بە دانانی بارمتەی یەک میلیارد تمەنی و بە شێوەی کاتی لە زیندانی ئەم شارە ئازاد کرا.
ڕۆژی دووشەممە، یەکی خەزەڵوەر، مادح خۆشنەواز، ئەندامی ئەنجومەنی سەوز چیای مەریوان و چالاکی ژینگەپارێزی، بە دانانی بارمتە و بە شێوەی کاتی، ئازاد کرا.
شەوی یەکشەممە، ٣٠ی ڕەزبەر، سێ کۆڵبەری خەڵكی جوانڕۆ، بە تەقەی هێزە نیزامییەکانی حکوومەت لە سنووری نەوسوود بریندار کران.
بەپێی ڕاپۆرتی هێرانا، نایب عەسکەری، زیندانیی سیاسیی بەندکراو لە زیندانی ورمێ، پاش بەڕێوەچوونی کۆبوونەوەی ناڕەزایەتیدەربڕین بە حوکمەکەی لە لقی ٢ی دادگای ئینقلابی ورمێ، بە تۆمەتی "بەغی"، بە لەسێدارەدران مەحکووم کرا.
ئاژانسی هەواڵدەریی کوردپا
