ڕۆژی چوارشەممە ١٠ی خەرمانان، هێزە ئەمنییەتییەکان پێنج هاووڵاتیی کوردیان بە ناوەکانی "ئەسعەد ڕامین، خالید ڕامین، داوود ڕەحیمی، سەردار ڕامین و ڕامین ڕامین"، خەڵکی گوندەکانی "قاڕنێ" و "چەقەڵ مستەفا" سەر بە نەغەدە، دەسبەسەر کردووە.
ڕۆژی چوارشەممە ١٠ی خەرمانان، ئەبووبەکر ئیسماعیلی، بەڕێوەبەری کاناڵی تێلێگرامیی "ڕەبەت نیوز"، بانگهێشتی پۆلیسی فەتا و لێپرسینەوەی لێ کرا.
ڕۆژی چوارشەممە ١٠ی خەرمانان، محەممەد مەمەندزادە، چالاکی مەدەنی و ژینگەیی، بەهۆی ناڕەزایەتی دەربڕین بەنیسبەت ڕاگواستنی ئاوی بەنداوی سەردەشت و کەمیی ئاوی خواردنەوەی ئە شارە، بانگهێشتی پۆلیسی فەتا کرا.
لە چارەنووسی هاووڵاتییەکی کورد بە ناوی "عەلی عەلیزادە"، کوڕی حاجی عەزیز و خەڵکی گوندی "سەرچنار" سەر بە میاندواو، پاش دەسبەسەرکرانی، زانیارییەک لەبەردەستدا نییە.
ڕۆژی سێشەممە ٩ی خەرمانان، عەزیمە ناسری، هاووڵاتیی کوردی خەڵکی بۆکان، بە دانانی بارمتە لە زیندانی ناوەندیی ورمێ ئازاد کرا.
کاناڵی تێلێگرامیی "ڕووداوی هۆزی عالی"، لەژێر گوشار و هەڕەشەی ئیتڵاعاتی سپای پاسدارانەوە داخرا.
ڕۆژی پێنجشەممە ٤ی خەرمانان، هاووڵاتییەک بە ناوی "هۆشیار شەعبانی"، تەمەن ٢٨ ساڵ و خەڵکی بانە، لەلایەن هێزە ئەمنییەتییەکانەوە دەسبەسەر کراوە.
ڕۆژی سێشەممە ٩ی خەرمانان، دوو کۆڵبەر بە ناوەکانی "بەهمەن کەریمپەنا"، خەڵکی "ئارمەردە"ی بانە و "ئارمان ڕەسووڵی"، خەڵکی بۆکان، لە ئەنجامی تەقەی ڕاستەوخۆی هێزە نیزامییەکانی حکوومەتی، لە سنووری "هەنگەژاڵـ"ـی بانە، بریندار بوونە.
ڕۆژی پێنجشەممە ٤ی خەرمانان، دوو هاووڵاتیی کورد بە ناوەکانی "زاگرۆس عەباسی" تەمەن ٢٢ ساڵ کوڕی مارف و "ئەحمەد عەزیزی" کوڕی عەتا خەڵکی گوندی "شیان" سەر بە شاری سنە، بە دانانی بارمتە لە زیندانی ئەو شارە ئازاد کران.
ڕۆژی یەکشەممە ٧ی خەرمانان، دوو هاووڵاتیی کورد بە ناوەکانی "حەیدەر عەلیزادە" خەڵکی گوندی "قەزەناوێ" و "شێرزاد مامەندی" خەڵکی گوندی "نەرزیوێ" سەر بە شاری شنۆ، لەلایەن هێزە ئەمنییەتییەکانەوە دەسبەسەر کران.
ئاژانسی هەواڵدەریی کوردپا
