ئیبراهیم (شۆڕش) شووریانی، چالاکی میدیایی و بەڕێوەبەری کاناڵی تێلێگرامیی"پرسە و سەرەخۆشییەکانی بانە"، بەبێ ئامادەبوونی لە دادگا، لەلایەن دادسەرای گشتی و ئینقلابی بانە، ۷ مانگ زیندانی تەعزیریی بەسەردا سەپا.
ئەمڕۆ یەکشەممە ٢٥ی ڕەزبەر، هاووڵاتییەکی کورد بە ناوی "عەلی زولفی" کوری حەمزە و خەڵکی شاری بۆکان، بۆ جێبەجێکردنی حوکمەکەی، ڕەوانەی زیندانی ئەو شارە کرا.
لە ماوەی ڕۆژانی ڕابروودا، هاووڵاتییەکی کورد بە ناوی "حەسەن فەرەجی"، تەمەن ٤٤ ساڵ، کوڕی محەممەد و خەڵکی گوندی "لەنجاوا"ی شاری مەریوان، لەلایەن دادگای ئینقلابی ئەو شارەوە، ١٠ مانگ زیندانی تەعزیریی بەسەردا سەپا.
ڕۆژی پێنجشەممە ٢٢ی ڕەزبەر، کۆڵبەرێک بە ناوی "ژیان عەلیپور"، خەڵکی گوندی "بێژوێ" سەر بە سەردەشت، لە ئەنجامی تەقەی هێزە نیزامییەکانی حکوومەتی کوژرا.
ڕێکخراوی مافی مرۆڤی ئێران کە هەواڵی لەسێدارەدانی هاووڵاتییان لە کوردستان و ئێران ڕووماڵ دەکات، باسی لە لەسێدارەدانی دوو زیندانی بە تۆمەتی "کوشتنی بەئەنقەست" کە بە "قیساس" مەحکووم کرابوون لە زیندانی دێزڵاوای شاری کرماشان، کرد.
لە چارەنووسی هاووڵاتییەکی کورد بە ناوی "مۆحسێن ئەحمەدزادە"، کوڕی ڕۆستەم و خەڵکی گوندی "کۆسە کەرێز" سەر بە مەهاباد کە مانگی خەرمانانی ئەمساڵ لەلایەن هێزە ئەمنییەتییەکانەوە دەسبەسەر کرابوو، زانیارییەک لەبەردەستدا نییە.
ڕۆژی پێنجشەممە ٢٢ی ڕەزبەر، هاووڵاتییەکی کورد بە ناوی "زاهیر ڕووزخوون"، خەڵکی گوندی "کۆسەکەرێز" سەر بە مەهاباد، بە دانانی بارمتە لە زیندانی ئەو شارەدا، ئازاد کرا.
ڕۆژی پێنجشەممە ٢٢ی ڕەزبەر، ئەندامێکی هێزە نیزامییەکان لە ناوچە سنوورییەکانی نەوسوود، بەهۆی تەقینەوەی مین بریندار بووە و لاقی چەپی لەدەست داوە.
موژگان کاووسی، نووسەر و لێکۆڵەری کورد کە ڕۆژی چوارشەممە ٢١ی ڕەزبەر لە زیندانی کەچووئیی کەرەج بۆ زیندانی ئێڤین ڕاگوێزرابوو، دیسانەوە گەڕێندراوەتەوە بۆ زیندانی کەچووئیی کەرەج.
ڕۆژی سێشەممە ٢٠ی ڕەزبەر، هاووڵاتییەکی کورد بە ناوی "کاوە سلێمانپوور"، خەڵکی گوندی "خوڕخوڕە" سەر بە مەهاباد، بە دانانی بارمتە لە زیندانی ئەو شارە، ئازاد کرا.
ئاژانسی هەواڵدەریی کوردپا
