سەرلەبەیانی ئەمڕۆ یەکشەممە ١٣ی خەرمانان، دوو کۆڵبەر بە ناوەکانی "ئیقباڵ عەلیزادە" دانیشتووی شاری مەریوان و "پەرویز مورادی" خەڵکی شاری سەلاسی باوەجانی، بە تەقەی هێزە نیزامییەکانی حکوومەتی لە سنووری نەوسوود، پێکران.
ڕۆژی شەممە ١٢ی خەرمانان، هاووڵاتییەکی کورد بە ناوی "محەممەد مەحموودزادە" خەڵکی شاری بانە بە دانانی بارمتە لە یەکێک لە گرتنگە ئەمنییەتییەکانی سنە ئازاد کرا.
حوکمی ٦ ساڵ و ٨ مانگ زیندانی تەعزیریی سومەیە کارگەر، هاووڵاتیی خەڵکی ئیلام، بۆ سزای نەختی گۆڕدرا و دۆسییەکەی داخرا.
لە بارودۆخی هاووڵاتییەکی کورد بە ناوی "سلێمان سالک" تەمەن ٦٩ ساڵە خەڵکی شاری مەهاباد، پاش دەسبەسەرکرانی، زانیارییەک لەبەر دەستدا نییە.
ڕۆژی پێنجشەممە ١٠ی خەرمانان، کۆڵبەرێک بە ناوی "محەممەد ئەسلانی" تەمەن ٣٦ ساڵ خەڵکی گوندی "کونەمشکێـ"ـی شاری سەردەشت، بەهۆی تەقەی هێزە نیزامییەکانی حکوومەتی، لە سنووری بانە، پێکرا.
ڕۆژی یەکشەممە ٦ی خەرمانان، هاووڵاتییەکی کورد بە ناوی "ئەشکان جەمشیدی"، خوێندکاری ئەندازیاری مێعماری لە شاری سنە، لەلایەن هێزە ئەمنییەتییەکانەوە دەسبەسەر کرا.
سەرەڕای تێپەڕینی ٣٩ ڕۆژ بە سەر دەسبەسەرکرانی هاووڵاتییەکی کورد بە ناوی "لوقمان گرامی" کوڕی ئیبراهیم خەڵکی گوندی "سەردۆشی مەریوان، لە چارەنووسی ناوبراو هیچ زانیارییەک لە بەردەستدا، نییە.
لە ماوەی ڕۆژانی ڕابردوودا، کۆڵبەریک بە ناوی "عەبدوڵڵا جەبارزادە" خەڵکی شاری سەردەشت، بەهۆی تەقەی هێزە نیزامییەکانی حکوومەتی لە سنووری "نۆکان"ی ئەو شارە، پێکرا.
ڕۆژی هەینی ١١ی خەرمانان، عەتا ڕەحمانزادە، زیندانیی سیاسیی کورد پاش تەواوبوونی ماوەی زیندانییەکەی، لە زیندانی سەقز ئازاد کرا.
بەپێی ڕاپۆرتی ڕێکخراوی مافی مرۆڤی ئێران، ڕۆژی چوارشەممە ٩ی خەرمانان، حوکمی لە سێدارەدانی هاووڵاتییەک بە ناوی "محەممەدحەسەن کەهراری" تەمەن ٢٧ ساڵ خەڵکی شاری کرماشان، لە زیندانی ئەراک جێبەجێ کرا.
ئاژانسی هەواڵدەریی کوردپا
