ڕۆژی دووشەممە ١٠ی خەرمانان، لاوێکی کورد بە ناوی "سالار چاوشی" کوڕی "عەبدوڵڵا"، تەمەن ٢١ ساڵ و خەڵکی گوندی "حاجی لەکـ"ـی ناوچەی چۆمی مەجیدخانـ"ـی بۆکان، پاش بانگهێشتکردنی بۆ ئیدارەی ئیتلاعاتی بۆکان، دەسبەسەر کرا.
ڕۆژی دووشەممە ١٠ی خەرمانان، هاووڵاتییەکی کورد بە ناوی "سدیق سەیفی" خەڵکی دیواندەرە، بۆ تێپەڕاندنی ماوەی زیندانییەکەی ڕەوانەی زیندانی سنە کرا.
ڕۆژی پێنجشەممە ١٣ی خەرمانان، هاووڵاتییەکی کورد بە ناوی "عادڵ موکەڕەم" خەڵکی ورمێ، پاش ١٠ مانگ ناڕوونیی چارەنووسی لە لقی ٢ی دادگای ئینقلابی ئەو شارە، بە سەرۆکایەتیی دادوەر "شێخلوو" دادگایی دەکرێت.
ڕۆژی یەکشەممە ٩ی خەرمانان، دوو هاووڵاتیی عەرەب لە ناوچەی ئاسیائاوای پارێزگای ئەهواز، بە تەقەی هێزە نیزامییەکانی حکوومەتی ئێران لەنێو ماشینێک لە جۆری پراید، کوژران.
چەند ڕۆژ پێش هاووڵاتییەکی کورد بە ناوی "حەسیم میرزایی" خەڵکی جوانڕۆ، لەلایەن هێزە ئەمنییەتییەکانەوە دەسبەسەر کرا و بۆ شوێنێکی نادیار ڕاگوێزرا.
ڕۆژی پێنجشەممە ٦ی خەرمانان، مامۆستا "حەسەن جەنگخا"، مامۆستای ئایینیی کوردی خەڵکی ناوچەی مەرگەوەڕی ورمێ، پاش تەواوبوونی ماوەی لێپرسینەوەکەی بە دانانی بارمتەی ٣٠٠ ملیۆن تمەنی لە گرتنگەی ئیتلاعاتی ورمێ ئازاد کرا.
ڕۆژی هەینی ٧ی خەرمانان، هاووڵاتییەکی کورد بە ناوی "مەهدی ئیبراهیم زادە" کوڕی "ئیبراهیم"، تەمەن ٣٧ ساڵ و خەڵکی سەردەشت، لە شیراز سەر بە پارێزگای فارس، لەلایەن هێزە ئەمنییەتییەکانەوە دەسبەسەر کرا.
ڕۆژی پێنجشەممە ٦ی خەرمانان، هاووڵاتییەکی کورد بە ناوی "ڕەزا ڕەمەزانی" کوری ئیسفەندیار خەڵکی شاری شاباد، پاش نزیک بە سێ مانگ لە دەسبەسەرگە، بە دانانی بارمتە بە شێوەی کاتی، هەتا کۆتایی دادگاییەکەی لە زیندانی دیزڵاوای کرماشان ئازاد کرا.
هاووڵاتییەکی کورد بە ناوی "عەلی ڕەشیدی"ی خەڵکی گوندی "بەنەژاژ"ی شاری بانە، لەلایەن هێزە ئەمنییەتییەکانەوە دەسبەسەر کراوە.
"شەیدا(نیشتمان) ڕەسووڵ دنخه" مامۆستای یەکێک لە قوتابخانەکانی شاری شنۆ سەر بە پارێزگای ورمێ، بەهۆی گوشاری هێزەکانی ئیدارەی ئیتلاعاتییەکانی ئەو شارە، بە ناچاری زێدی خۆی بەجێهێشت.
ئاژانسی هەواڵدەریی کوردپا
