ئاژانسی هەواڵدەریی کوردپا
ڕۆژی هەینی ٤ی سەرماوەز، دوو منداڵی خەڵکی شاری سەردەشت بە تەقەی هێزەکانی سپای پاسداران بریندار بوون کە بارودۆخی یەکێکیان، نالەبار ڕاگەیەندراوە.
بە وتەی سەرچاوەیەکی ئاگادار، ئەو دوو منداڵە برا بوون و لە ماشینی خۆیاندا، لە یەکێک لە خاڵە پشکنینەکانی سپای پاسداران، لەلایەن هێزەکانی ئەو ڕێکخراوەوە تەقەیان لێ کراوە و فەرزاد زەینالی کە تەمەنی ١١ ساڵان و شۆفێری ماشینەکە بووە، بەهۆی بەرکەوتنی گولــلەی هێزەکانی سپا لە سەری، بەسەختی بریندار کراوە.
ئەو سەرچاوەیە هەروەها دەڵێت: براکەی فەرزاد کە تەمەنی ٨ ساڵە، لەو ڕووداوەدا بریندار بووە.
ئەو سەرچاوەیە هەروەها دەڵێت: ئەو دوو برایە بە مەبەستی ڕۆیشتن بۆ ناو باخەکەی خۆیان لە نزیک شاری ڕەبەت، لە سێڕێیانی مەلاشێخ، لەلایەن هێزەکانی سپای پاسدارانەوە، تەقەیان لێ کراوە.
ئەو سەرچاوەیە هەروەها دەڵێت: بنەماڵەی ئەو دوو منداڵە لە ترسی دەسبەسەرکرانیان، سەرەتا لە بردنی منداڵەکانیان بۆ ناوەندی دەرمانی خۆیان بواردووە و پاش خراب بوونی باری تەندروستیی فەرزاد، کوڕەکەیان ڕەوانەی نەخۆشخانەی مەهاباد، کردووە.
بەپێی گرتە ڤیدیۆیەکە، سی تی ئیسکەنی سەری فەرزاد، هێشتا چەند ساچمەیەکی تێدایە و ئێسکەسەری ئەو منداڵە شکاوە.
