ئاژانسی هەواڵدەریی کوردپا
ئاژانسی كوردپا: هاووڵاتییەكی پیرانشاری لە ناوچە سنوورییەكانی كوردستان بە هۆی سەرما و سۆڵەوە گیانی لەدەست دا.
بەپێی راپۆرتی ئاژانسی هەواڵدەریی كوردپا، شەوی رابردوو رێكەوتی ١٩ی رەشەمە لاوێک بەناوی "سالار بیکشۆ"، تەمەن ٢٨ ساڵ و كوڕی عوسمان و خەڵكی پیرانشار بەهۆی سەرماوە رەق هەڵاتووە و لە ئەنجامدا بۆتە هۆی گیان لەدەست دانی.
ئەو لاوە لەشوێنێک بەناوی "كانی خودا" لەسنووری كوردستانی ئێران و هەرێمی كوردستان تووشی ئەو رووداوە بووە و تەرمەكەی لەلایەن خزم و كەسەكانی دۆزراوەتەوە.
هەتا بڵاو بوونەوەی ئەو هەواڵە تەرمی "سالار" رادەستی بنەماڵەكەی نەكراوەتەوە و لەنەخۆشخانەی پیرانشار راگیراوە.
هاووڵاتیان و كۆڵبەرانی كورد بە بەردەوامی لەكاتی سەرما و سۆڵەدا تووشی رووداوی لەم چەشنە دەبن و هێندیک جاریش بۆ ماوەی چەندین رۆژ تەرمەكانیان نەدوزراوەتەوە.
ماوەیەک لەمەوبەر بارینی بەفری زۆر و دروست بوونی سەرما و سۆڵە، لە ناوچە كوێستانییەكانی ناوچەی ورمێ لە سنووری وڵاتی توركیە، چوار كۆڵبەری كوردی خەڵكی ناوچەی "مەرگەوەڕ"ی ورمێ گیانیان لەدەست دا و تەرمەكانیان دوای چەندین رۆژ لەژێر بەفر دەرهێنرانەوە.
