ئاژانسی کوردپا: خوسرەو و مەسعوود کوردپوور کە ماوەی ٤ مانگ و نیوە لەلایەن هێزە ئیتلاعاتییەکانەوە لە دەستبەسەریدان، رۆژی دووشەممە رێکەوتی ١٤ی گەلاوێژ لە دادگای ئینقلابی مەهاباد دادگایی دەکرێن.

بەپێی راپۆرتی ئاژانسی هەواڵدەریی کوردپا و بە وتەی کەسێکی نزیک لەبنەماڵەی کوردپوور، خوسرەو کوردپوور تاوانی موحاربە لە رێگەی "١-هاوکاری کردنی حیزبە کوردییەکانی ئۆپۆزسیۆنی حکوومەتی ئیسلامیی ئێرانەوە بۆ پێکهێنانی کۆبوونەوەی ناڕەزایەتی ٢- بێ حورمەتی کردن بەریبەری نیزام ٣- پڕوپاگەندە بەدژی نیزام و بڵاوکردنەوەی درۆ و بەمەبەستی تێکدانی رای گشتیی" دراوەتە پاڵ.

هەروەها "مەسعوود کوردپوور"یش تاوانی ١- پێکهێنانی کۆبوونەوەی ناڕەزایەتی بەدژی تەناهی نەتەوەیی ٢- بێ‌ڕێزی کردن بە رێبەری نیزام ٣- چالاکیی تەبلغیی بەدژی نیزامی پێ راگەیاندراوە.

کەسێکی نزیک لە بنەماڵەی برایانی کوردپوور بە ئاژانسی کوردپای راگەیاند، هەتا ئێستا تاوانی موحارب بۆ خوسرەو کوردپوور نەسەلمێندراو و ئەم تاوانەش بەدوور لە راستییە.

مەسعوود و خوسرەو کوردپوور لە کاتێکدا بەرەورووی دادگا دەبنەوە، کە ئەو دوو برا رۆژنامەنووسە بەشێوەی سەربەخۆ و بەبێ لایەنگری، هەواڵی ناوچە کوردنشینەکانی ئێــرانیان روماڵ کردووە.

ناوبراو ئاشکرای کرد کە پارێزەرانی برایانی کوردپووریش بەرەورووی فشاری ‌هێزە ئیتلاعاتییەکان بوونەتەوە و ئەگەری دەستبەسەر کرانیان بەدوور لە چاوەڕوانی نییە.

"عەباس جەماڵی، عوسمان موزەیەن و نێعمەت ئەحمەدی" ئەرکی پارێزەریی پەروەندی ئەو دوو برا رۆژنامەنووسە کوردەیان بە ئەستۆ گرتووە.

رێکەوتی ١٧ و ١٩ی رەشەمەی ١٣٩١ی هەتاوی خوسرەو و مەسعوود کوردپوور لەلایەن هێزە ئیتلاعاتییەکانی حکوومەتی ئیسلامیی ئێرانەوە لە شاری مەهاباد دەستبەسەر کران.

خوسرەو کوردپوور ماوەی ٢٥ رۆژ بەنیشانی ناڕوونیی پەروەندەکەی لە زیندانی ئیتلاعاتی سپای ورمێ مانی لە خواردن گرت.