كوردپا: جەلال مەلەكشا، شاعێر و نووسەری كورد كە كۆمەڵێك بەرهەمی فارسی و كوردیی ئامادەی چاپن، لەلایەن ئیدارەی فەرهەنگ و ئیرشادی ئیسلامیی پارێزگای كوردستانەوە مۆڵەتی چاپی بەرهەمەكانی نادرێت.

جەلال مەلەكشا، شاعێر و نووسەری كورد لە لێدوانێكی تایبەتدا بە ئاژانسی هەواڵدەریی كوردپا راگەیاند، "دیارە لە ساڵانی پێشوودا بەرهەمە شێعرییە فارسی و كوردییەكانم كۆ كردۆتەوە و بۆ مۆڵەتی چاپ بە ئیدارەی فەرهەنگ و ئیرشادم داوە و رەت كراوەتەوە، بەڵام زیاتر لە چوار ساڵە سەرجەم شێعرە فارسییەكانم و هەروەها چیرۆكە كوردییەكانم لە ئیدارەی فەرهەنگ و ئیرشادی ئیسلامیی پارێزگای كوردستان مۆڵەتیان پێ‌ نادرێت".

جەلال مەلەكشا، هۆكاری نەدانی مۆڵەتی بەرهەمەكانی گەڕاندەوە "بۆ ناوەرۆكی بەرهەمەكانی خۆی و ئەو خاڵانەی كە بەشی سانسۆری ئیدارەی فەرهەنگ و ئیرشاد وەك "هێڵی سوور" ناودێری دەكات و وتیشی:هەر بەرهەمێك لەگەڵ بیروباوەڕی ئەواندا تەبا نەبێت و لەو هێلە سوورە لابدات، مۆڵەتی چاپی پێ‌ نادرێت"

جەلال مەلەكشا لە درێژەی لێدوانەكەیدا راشیگەیاند: "كۆمەڵێك لە شێعرە كوردییەكانم بەناوی "زڕەی زنجیری وشە دیلەكەكان" چاپ كراون و سەرجەم شێعرە فارسییەكانیشم بەناوی "گۆرانییەكانی وەرزی دڵەڕاوكی" چوار ساڵە لە ئیرشادە و بێ‌ مۆڵەت ماونەتەوە و ئەوەشی زیاد كرد كە ئێستا دوو كۆمەڵە شێعری كوردیم كە یەكیان ناوی "كارەسات"ە و هێشتا ئەوی دیكەیان ناوم بۆ دیاری نەكردووە، بێ‌ مۆڵەت ماونەتەوە".

راشیگەیاند: "چەندین بەرهەمی دیكەی وەك: شێعر و چیرۆكی فارسی و كوردی و كۆمەڵێك كاری وەرگێرانم هەیە كە هێشتا كۆم نەكردوونەتەوە و بە تەمام لە داهاتوودا كاریان لەسەر بكەم".

جەلال مەلەكشا سالی ١٣٣٠ی هەتاوی لە گوندی "مەلەكشا" سەر بە شاری سنە لەدایك بووە.
هەر لە شاری سنە خویندوویەتی و پەروەردە كراوە. لە منداڵییەوە ئۆگری شیعر و نووسین بووە و سەرەتا بە زمانی فارسی دەستی بە نووسین كردووە.

جەلال مەلەكشا شاعێرێكی ئاشتیخواز و دەروەست نەیتوانی لە هەمبەر زوڵم و زۆردایی سەردەمدا چاو بنووقێنێ و ئەسپی قەڵەمی لە مەیدانی خەبات دژ بە زوڵمدا تاو داوە و لە سۆنگەی ئەم ئەم بیروباوەڕەیەوە تووشی كێشە و ئازار و زیندانیی زۆر بووە.

لە سەرەتاوە بە فارسی شیعر و پەخشان و چیرۆكی نووسیوە و لەبەر هێز و پێزی نووسینەكانی بەبێ ئەوەی كە كتێبی چاپكراوەی هەبێ‌، دەبێتە ئەندامی «كانوونی نووسەرانی ئێران».
پاش ساڵی ١٣٥٧ دەست دەكات بە كوردی نووسین و لەم بوارەشدا بە ئەزموونێكی زۆرەوە سەركەوتنێكی بەرچاوی دەبێ.

بۆ ماوەی ١٤ ساڵ وەكوو نووسەر و رۆژنامەوان دەبێتە ئەندامی دەستەی نووسەرانی گۆڤاری سروە بەپرسی لاپەڕەی ئەدەب و وەڵامدانەوە بە خوێنەر و شاعێرانی لاوی لە ئەستۆ بووە كە رۆڵی بەرچاوی گێڕاوە.

شیعرەكانی جەلال هەتا ئێستا بە زمانەكانی فارسی، عەرەبی، ئینگلیزی، سوێدی و... وەرگێڕدراون.

جەلال مەلەكشا ئێستا دانیشتووی شاری سنەیە و بەردەوامە لە نووسین و داهێنان.

وێنە: پەیجی فەیسبووکی جەلال مەلەکشا