ڕۆژی چوارشەممە ٥ی سەرماوەز، هاووڵاتییەکی کورد بە ناوی "ئیسماعیل عەلیپەروەری" خەڵکی شاری بۆکان، بە دانانی بارمتەی ٥٠٠ میلیۆن تمەنی، هەتا کۆتایی دادڕەسییەکەی بە شێوی کاتی لە زیندانی ورمێ ئازاد کرا.
ڕۆژی دووشەممە ٣ی سەرماوەز، داریووش مورادی، چالاکی فەرهەنگیی کورد خەڵکی شاری شاباد سەر بە پارێزگای کرماشان، لەلایەن هێزە ئەمنییەتییەکانەوە دەسبەسەر کرا.
ڕۆژی سێشەممە ٤ی سەرماوەز، کۆڵبەرێکی کورد بە ناوی "داریووش وەلدبەیگی" تەمەن ٣١ ساڵ خەڵکی گوندی "نۆریاو" و دانیشتووی شاری پاوە، بە تەقەی هێزە نیزامییەکانی حکوومەتی، لە سنووری نەوسوود پێکرا.
ڕۆژی دووشەمە ٣ی سەرماوەز، هاووڵاتییەکی کورد بەناوی "ئەحمەد محەممەدی" تەمەن ٥١ ساڵ لەلایەن دادگای شاری سەقزەوە بانگهێشت دەکرا.
لە ماوەی ڕۆژانی ڕابردوودا، لقی ١ی دادگای ئینقلابی شاری سنە، بە سەرۆکایەتی دادوەر "سەعیدی" هاووڵاتییەکی کوردی بە ناوی "خالید زەمانی" خەڵکی شاری کامیارانی بە ٥ ساڵ زیندانیی تەعلیقی مەحکووم کرد.
ڕۆژی شەممە ١ی سەرماوەز، هاووڵاتییەکی کورد بە ناوی "واحید عەباسزادە" تەمەن ٣٥ ساڵ کوڕی عوسمان خەڵکی گوندی "کەوپێچی خواروو" سەر بە شاری بانە، لەلایەن هێزە ئەمنییەتییەکانەوە دەسبەسەر کرا.
ڕۆژی دووشەممە ٣ی سەرماوەز، چالاکێکی فەرهەنگی بە ناوی "ئانیسا جەعفەری مێهر" تەمەن ٢٧ ساڵ، لەلایەن هێزە ئەمنییەتییەکانەوە لە شاری شاباد سەر بە پارێزگای کرماشان دەسبەسەر کرا و بۆ شوێنێکی نادیار ڕاگوێزرا.
ڕۆژی یەکشەممە ٢ی سەرماوەز، لاوێکی کورد بە ناوی "عەتا فەتاحی" تەمەن ٢٤ ساڵ کوڕی محەممەد خەڵکی گوندی "سەردۆشـ"ـی مەریوان، بە دانانی بارمتە بە شێوەی کاتی ئازاد کرا.
بڕیار کاوە، زیندانیی سیاسیی کورد خەڵکی گوندی "نێـ"ـی مەریوان، بە شێوەی مەرجدار لە زیندانی ئەو شارە ئازاد کرا.
بەپێی ئاماری تۆمار کراو لە ناوەندی ئاماریی ڕیکخراوی مافی مرۆیی کوردپا لە مانگی خەزەڵوەری ساڵی ١٣٩٩دا، سەرجەم ٦١ هاووڵاتیی کورد لە کوردستانی ئێران، دەسبەسەر کراون.
ئاژانسی هەواڵدەریی کوردپا
