ئاژانسی هەواڵدەریی کوردپا بۆ زیاتر زەق کردنەوەی پێشێلکاریی مافی مرۆڤ دەرهەق بە هاووڵاتییانی کورد لەناوچە کوردییەکانی ئێران حەفتانە راپۆرتێک لەژێر ناوی "روانگەی حەفتە"دا بڵاو دەکاتەوە.
حەفتەی کۆتایی مانگی خەزەڵوەری ١٣٩٢ی هەتاوی
هاووڵاتییەکی کوردی خەڵکی شاری مەریوان، پاش بانگهێشت کران و خۆ ناساندن بە ئیدارەی ئیتلاعاتی ئەو شارە، دەستبەسەر کرا.
ژنە چالاکێکی فەرهەنگیی شاری بۆکان لەلایەن هێزە ئەمنیەکانەوە لە رێگەی تەلەفۆنەوە ئاگادار کراوەتەوە کە خۆی بە ئیتلاعاتی سپای پاسداران لەو شارە بناسێنێت.
دوابەدوای ئەوەی كە خوێندكارێكی سنەیی لە ئەنجامی كەمتەرخەمی لێپرسراوانی کۆلێژی پەردیسی تاران کە بە هۆی بەرق گرتوویەوە گیانی لەدەست دا، ژمارەیەكی بەرچاو لەخوێندكارانی ئەو زانكۆیە خۆپیشاندانیان بەڕێوە برد.
هووشەنگ عوسمانی برای ئەوین عوسمانی کە رۆژی پێنج‌شەممە رێکەوتی ٢٢ی رەزبەر بەدەستی هێزە چەکدارەکانی حکوومەتی ئێران کوژرا، هەواڵی ماڵپەڕی بی‌بی‌سی لەمەڕ بە هەڵە کوژرانی خوشکەکەی، رەت دەکاتەوە.
لەمانگی خەزەڵوەری ١٣٩٢ی هەتاویدا، ١٢ کرێکار لەناوچە کوردنشینەکانی ئێران بە هۆی رووداوی کار و رووداوەکانی دیکە بوونەتە قوربانی و لەکۆی گشتیی ئەو رێژەیە ١١ کەسیان گیانیان لەدەست داوە و کەسێکی دیکەش بریندار بووە.
كۆمیتەی سێیەمی سەر بە كۆڕی گشتیی رێكخراوی نەتەوەیەكگرتووەكان، لە ٦٨ـەمین دانیشتنی خوێدا، بڕیارنامەی پێشێڵكردنی مافی مرۆڤی لەئێران پەسند كردەوە.
خالید حەردانی زیندانیی سیاسیی عەرەب بە تۆمەتی سووکایەتی کردن بە رێبەری نیزام، حوکمی ٢ ساڵ زیندانیی تەعزیریی بۆ بڕایەوە.
ژنێکی تەمەن ٢٨ ساڵەی خەڵکی شاری بۆکان بە هۆی کێشە بنەماڵەییەوە هەوڵی خۆ کوژیدا و لە ئەنجامدا بووە هۆی گیان لەدەست دانی.
ئاژانسی هەواڵدەریی کوردپا
