ئاژانسی هەواڵدەریی کوردپا
ڕۆژی چوارشەممە ۲۹ی ڕەزبەری ۱۴۰۵، ڕێوڕەسمی ڕێزلێنان و یادکردنەوەی «لوقمان نادرپوور»، لە کەسایەتییە دیارە فەرهەنگی و هەڵکەوتووەکانی کوردستان، بە هەوڵی کۆمەڵێک لە هاوڕێیان، چالاکانی مەدەنی و هۆگرانی فەرهەنگ و هونەر، لە هۆڵی «پەردیسی سینەمایی مێهری سەقز» بەڕێوە چوو. ئەم ڕێوڕەسمە لەژێر ناونیشانی «فڕین، کۆتایی نییە»، بە پیشانگایەک لە بەرهەمەکانی، گێڕانەوەی زارەکیی کەسایەتییە فەرهەنگییەکان سەبارەت بە ڕۆڵ و چالاکییەکانی و پێشکەشکردنی سروود بەڕێوە چوو. ئەم ڕێوڕەسمە دەرفەتێک بوو بۆ زیندووڕاگرتنی یادی ناوبراو و جەختکردنەوە لەسەر گرنگیی پاراستنی بەرهەمەکان و کەلەپووری فەرهەنگیی کوردستان و گواستنەوەی بۆ بەرەکانی داهاتوو.
لە دەستپێکی ئەم ڕێوڕەسمەدا کە لە کەشوهەوای سینەما و نگارخانەی پەردیسی سەقزدا بەڕێوە چوو، ئامادەبووان بە بەرزڕاگرتنی یاد و بەسەرهاتی ئەم نووسەر، وێنەگر و گرافیستە، یادی هەوڵەکانیان کردەوە لە بواری تۆمارکردنی وێنەکان، توێژینەوە لەسەر فەرهەنگی ناوچەیی و ڕێزگرتن و پاراستنی کەلەپووری فەرهەنگی و فولکلۆری کوردی. ئەم چالاکییانە ڕەنگدانەوەی پێگە و شوێنی ئەو بوون وەک کەسایەتییەکی جەماوەری و فەرهەنگی لە شاری سەقز و ناوچەی کوردستاندا.
ڕێوڕەسمی یادکردنەوەی لوقمان نادرپوور و پیشانگای بەرهەمەکانی بە پێشوازیی نووسەران، هونەرمەندان، چالاکانی مەدەنی و هاووڵاتییانەوە بەڕێوە چوو. ئەم ڕووداوانە زیاتر لە ڕێزلێنانێکی ئاسایی، جەختیان لەسەر بەردەوامیی ڕێڕەوی بیری و فەرهەنگیی ئەو و بەردەوامبوونی هەوڵەکانی بۆ پاراستنی ناسنامەی ڕەسەن کردەوە.
لوقمان نادرپوور؛ کەسایەتییەک لە بواری فەرهەنگ، هونەر، پەروەردە و وەرزش:
لوقمان نادرپوور لە کەسایەتییە ناسراوە فەرهەنگی، هونەری، پەروەردەیی و وەرزشییەکانی شاری سەقز بوو کە لە بوارەکانی نووسین، توێژینەوە، وێنەگری، گرافیک، پەروەردە و وەرزشدا چالاکیی دەکرد. ڕۆڵێکی بەنرخی هەبوو لە تۆمارکردنی وێنەکان، توێژینەوە لەسەر فەرهەنگی ناوچەیی، ڕێزگرتنی کەلەپووری فەرهەنگی و فولکلۆری کوردی و هەروەها پەروەردەکردنی نەوەی لاو لە سەقزدا.
دەکرێت ڕەهەندە بەرچاوەکانی چالاکی و کاریگەرییەکانی لە چەند تەوەرێکدا تاوتوێ بکرین:
گێڕەرەوەی وێنەیی و بیرگە (حافظە)ی فەرهەنگی: لە ماوەی ساڵانێک چالاکی لە بواری وێنەگری، گرافیک و بەڵگەفیلمسازیدا، بەشێکی گرنگی لە دیمەنەکان، ئایینەکان، کەسایەتییەکان و شێوازی ژیانی ڕەسەن لە کوردستانی لە قاڵب و چوارچێوەی وێنە و بەرهەمە گرافیكییەکاندا تۆمار کرد و بە یادگار هێشتییەوە. ئەم بەرهەمانە بەشێک لە بیرگەی بینایی و مێژوویی ناوچەکە دێنە ئەژمار.
توێژەری فەرهەنگ و فولکلۆر: نادرپوور خەمخۆرییەکی جیددیی هەبوو بۆ پاراستنی کەلەپووری زارەکی، دابونەریت و فولکلۆری کوردی و لە بواری ناساندن، تۆمارکردن و گواستنەوەی ئەم ڕەگەزە فەرهەنگییانە بۆ نەوەکانی داهاتوو چالاکیی دەکرد.
مامۆستا و ڕاهێنەری وەرزشی: چالاکییەکانی تەنیا بە هونەر و توێژینەوە سنووردار نەبوون؛ ساڵانێک لە بەرگی مامۆستایەکدا بە وانەوتنەوە و پەروەردەکردنی نەوەی لاو خەریک بوو و لە بواری وەرزشیشدا هاوڕێی مێرمنداڵان و لاوان بوو و ڕۆڵی لە پەروەردەکردنیان هەبوو.
ڕێوڕەسمەکەی سەقز، یەکەمین رێوڕەسمی یادکردنەوە و پیشاندانی بەرهەمەکان و یادگارییەکانی لوقمان نادرپوور لە دوای کۆچی دوایی ناوبراو بوو. نادرپوور دوای ماوەیەکی درێژ لە خۆڕاگری بەرانبەر نەخۆشیی شێرپەنجە، لە ڕێبەندانی ۱۴۰۴ لە شاری سەقز کۆچی دوایی کرد؛ لە کاتێکدا کە ئینتێرنێت لە ئێراندا بڕابوو و ئاڵۆزی و شەڕ لە نێوان کۆماری ئیسلامیی ئێران، ئەمریکا و ئیسرائیل لە ئارادا بوو.
بەڕێوەچوونی ئەم ڕێوڕەسمە و پیشاندانی بەرهەمەکانی، دەرفەتێک بوو بۆ خوێندنەوەی دووبارەی چالاکی و کەلەپووری فەرهەنگی و هونەریی ئەم کەسایەتییە کوردستانییە؛ کەلەپوورێک کە لە تۆمارکردنی بیرگەی بەکۆمەڵ، ڕێزگرتنی فەرهەنگی ڕەسەن و گواستنەوەی بەها فەرهەنگییەکان بۆ نەوەکانی داهاتوو گرنگیی تایبەتی هەیە.
