ئاژانسی هەواڵدەریی کوردپا
ئاژانسی كوردپا: ٤٠ كەس لەكرێكاران و كارمەندانی شیركەتی پوویا غەرب بە نیشانەی زەوت كردنی خانووەكانیان، لەبەردەم ئوستانداریی و دەفتەری ئیمام جومعەی كرماشان كۆبوونەوە و ناڕەزایەتیان دەربڕی.
بەپێی هەواڵی ئاژانسی هەواڵدەریی كوردپا، خاوەنی شیركەتی پوویا غەرب چەند ساڵ لەمەوبەر چەندین بینای بۆ كرێكاران و كارمەندانی ئەو شیركەتە دروست كرد و بە شێوەی قەرز پێیداون و لەبری ئەو كارە سەنەدی خانووەكانی وەكوو وەسیقە لای بانكی سادرات و تجارەت لەكرماشان داناوە.
خاوەنی ئەو شیركەتە قەرزێكی زۆری لە ئەو دوو بانكە وەرگرتووە و لەبری دانەوەی ئەو قەرزە سەنەدی خانووەكانی كارمەندانی شیركەتەكەی وەكوو بارمتە بە بانكەكان داوە.
بەوتەی خاوەن خانووەكان، خاوەنی شیركەتی پوویا غەرب بە هیچ شێوەیەک ئامادە نیە قەرزی بانكەكان بداتەوە و ئەو دوو بانكەش لەبری قەرزەكانیان دەستیان بەسەر بیناكاندا گرتووە.
ئەو ٤٠ كرێكار و فەرمانبەرە وتووشیانە، "ئێمە بە تەواوەتی قەرزی خانووەكانمان بە خاوەن شیركەتەكە داوە و هەنووكە بانكی سادرات و تجارەت ئێمە بە خاوەنی خانووەكان نازانێ".
ئەو ٤٠ كەسە هاوڕێلەگەڵ بنەماڵەكانیان رۆژی شەممە رێكەوتی ٩ی سەرماوەز بەنیشانەی ناڕەزایەتی دەربڕین لە بەردەم ئوستانداری كرماشان كۆبوونەوە و دواتریش چووبوونە بەر دەم دەفتەری ئیمام جومعە.
بەوتەی شایەتحاڵان ئەو هاووڵاتییانە هیچ وڵامێكیان وەرنەگرتۆتەوە و دواتر چوونە سەربانی "موجتەمەعی ئاپارتمانەكانی پوویا غەرب" و دەستیان بە دروشم دان كردووە.
شیركەتی پوویا غەرب لە ٨ كیلۆمیتری جادەی سنە هەڵكەوتووە و كاری بەرهەمهێنانی "كابڵی فشار قەوی ئاڵۆمینیۆمی" دەكات.
