“Êbad Hebîbî”, çalakvanê medenî yê xelkê Sin; ji aliyê taya yekem a dadgeha Şoreşê ya vî bajarî bi serpereştiya dadwer “Se`îdî” bi yek sal girtîgeh ragirtî bo heyama sê salan hat cezakirin.
Êvariya roja Yekşemî 17’ê Banemerê welatiyekî Kurd ê bi navê “Mûsa Îsmaîlî” û xelkê Peswê yê ser bi Pîranşarê ji aliyê hêzên ewlehiyê ve hat girtin û bo cihekî nediyar veguhastin.
Roja Yekşemî 17’ê banemerê welatiyê Sinê yê bi navê “Keyvan Zendkerî” piştî 5 rojan ji serbestberdana demkî careke din ji aliyê hêzên ewlehiyê ve hat girtin.
Girtiyê olî “Îrec Sofî Mihemed” ji bo nîşandan nerazîbûnê li derheq rewşa xwe li girtîgeha Mehabadê de dest havêt bi gireva birçîbûnê.
“Zekeriya Xeyal” zarokê Pîranşarê di 29’ê Xermanana sala 1401’an de ji ber gulebarana hêzên serkutkar du guleyên li pişt, sing û destê wî ketibû, jiyana xwe ji dest da.
“Arvîn Nîkpey” welatiyê gundê “Nêy” yê Merîwanê li girtîgeha Îdareya Îtila`ata vî bajarî de xwe kuşt.
Derbarê çarenivîsa du welatiyên Kurd yên bi navên “Ehmed Xulamî” û “Resûl Obeydî” xelkê gundê “Sîveç” a bajarê Banê piştî ku ji aliyê hêzên ewlehiyê ve hatine girtin, ti agahî nehatine bidestxistin.
Sibeha roja Înê 15’ê Banemerê biryara îdamê yê girtiyê Serdeştê yê bi navê “Feramerz Şexisî” li girtîgeha Navendî ya Urmiyê hate bidarvekirin.
Sibeha roja Şemiyê 16’ê Banemerê, biryara îdamê yê du girtiyên bi navên “Selahedîn Mecîdî” û “Ebdullah Xanmihemedî” xelkê gundê “Heftvan” a ser bi navçeya Selmasê li girtîgeha vî bajarî de hatin bidarvekirin.
Roja Pêncşemî 14`ê Banemerê, cezayê îdamê yê girtiyê bi navê “Celaledîn Rehîmiyan Azar” yê xelkê Mehabadê li girtîgeha navendî ya Reştê (Lakan) birê ve çû.
Ajansa Nûçegihandinê ya Kurdpa
