هێزە لیباس شەخسییەکان، پێشیان بە ئازادکردنی چالاکێکی مەدەنیی کورد گرت

ئاژانسی کوردپا: هێزە لیباس شەخسییەکان، پێشیان بە ئازادکردنی چالاکێکی مەدەنیی کوردی خەڵکی شاری دێولان گرت.

"فەریدە وەیسی"، هاوژینی "سیرووس عەباسی"، لە لاپەڕەی ئینیستاگرامی خۆیدا ڕایگەیاند: "پاش دانانی بارمتە، حوکمی ئازادیی کاتیی سیرووس عەباسی، چالاکی مەدەنیی خەڵکی کوردستان، کە پاش ڕەخنەگرتن لە قسەکانی خامنەیی، دەسبەجێ خرابووە ژێر چاوەدێرییەوە، لە لایەن دادسەرای گشتی و ئینقلابی شاری دێولان، حوکمی ئازادیی کاتیی دەرکرا، بەڵام دواتر کە سەردانی زیندانی قوروەمان کرد، فەرمانبەرانی زیندانی قوروە ڕایانگەیاند کە کەسێک بەو ناوونیشانە لێرە نییە و کەسانی لیباس شەخسی ناوبراویان لەگەڵ خۆیان بردووە".

هاوژینی ئەو چالاکە مەدەنییە دەسبەسەرکراوە هەروەها نووسیویەتی: "سیرووس پاش بەڕێوەچوونی یەکەم دادگایی لە دادگوستەریی شاری دێولان، لە پەیوەندییەکی تەلەفۆنیدا ڕایگەیاند، بڕیارە ڕەوانەی زیندانی قوروە بکرێم و نامەی ئازادکردنم لە لایەن دادستانی دێولانەوە بۆ بەرپرسانی زیندانی قوروە نێدراوە".

"فەریدە وەیسی" لە هەمان کاتدا دووپاتی کردەوە کە سەردانی تەواوی ناوەندە نیزامی و ئەمنییەتییەکانی شاری دێولان و قوروەمان کردووە، بەڵام هیچ یەک لە بەرپرسان وڵامدەر نین.

ڕۆژی هەینی، ١٨ی گەلاوێژ، هاووڵاتییەکی کورد بە ناوی "سیرووس عەباسی"، خەڵکی شاری دێولان، پاش ڕەخنە لە ڕێبەری نیزام و بارودۆخی نالەباری مەوجوود، لە لایەن هێزە ئیتلاعاتییەکانەوە دەسبەسەر کرا.

سه‌رچاوه http://www.kurdpa.net/sorani‌ به‌سته‌ری بابه‌ت http://www.kurdpa.net/sorani/dreje/78095